Remo Bodei, unu filosofu sardu e cosmopolita de aberu, de Federicu Francioni

EDITORIALE de sa DOMINIGA,  de sa  FONDATZIONE

Bodei nos at lassadu: su raportu suo cun sa Sardigna. Est dae pagu iscumpàrfidu Remo Bodei, filosofu de cabbale, nàschidu in Casteddu in su 1938. Si fiat formadu in s’Iscola normale de Pisa, aiat istudiadu in Germània e aiat traballadu pro annos e annos a s’Ucla (Univeristy of California, Los Angeles).

Deo apo àpidu sa bona sorte de lu connòschere e ascurtare, pro sa prima borta, in su mese de Sant’Andria de su 1980 in Tàtari, unue Antoni Delogu (professore de Filosofia morale in s’Universidade tataresa) lu aiat invitadu pro partetzipare a su cumbèniu “Libertà e liberazione nel pensiero contemporaneo”; intre sos àteros reladores m’ammento mescamente de Giulio Girardi (isse puru  fiat. tando, professore in s’Ateneu turritanu), mastru de vida e de pensieru, autore de òberas de importu mannu, antzis, tzentrales pro sa teologia de sa liberatzione; Giacomo Contri (istudiosu de Jacques Lacan) e àteros. A pustis, sa rivista “Quaderni sardi di filosofia e scienze umane” (su diretore fiat Delogu matessi) aiat publicadu sas relatas e sos contributos de custos e de àteros autores: nos piaghet ammentare inoghe Domenico Corradini, Barbara Kleiner e Antoneddu Ruzzu. A costàgiu de cuddu cumbèniu, in su momentu de su cumbidu, deo e àteros partetzipantes aiamus iscobertu su piaghere de faeddare cun Bodei chi fiat de aberu filosofu de su diàlogu.

In su 1996, Bodei torrat in Sardigna pro faeddare in un’adòviu calificante de sa Fondatzione Sardinia, chèrfidu dae Pràtzidu Cherchi: isse a pustis aiat cuntivigiadu su libru Agostino d’Ippona e le apocalissi dell’Occidente (Cagliari, 1998, cun iscritos de L. Ruggiu, V. Grossi, R. Bodei, M. Bettetini, M. Bua, B. Forte, G. Carchia, S. Givone, R. Klein, P. Cherchi, G. Angioni, N. Rudas, B. Bandinu, M. A. Mongiu).

In un’àteru cumbèniu – ammanigiadu in Casteddu (nadale de su 2011) dae sa Fondatzione matessi subra su problema de sa responsabilidade de sos intellettuales, mescamente sardos – Bodei aiat lèghidu una parte de sa relata sua in una limba sarda bia, rica e articulada: est a nàrrere chi aiat proadu, un’àtera borta galu, chi in sardu, cun cuntivìgiu, est possìbile faeddare de calesisiat tema e problema. Cherimus ammentare custu adòviu de Casteddu non solu pro s’interbentu de Bodei, ma finas pro s’importàntzia de su chi tando aiant nadu sos giai ammentados Bandinu e Cherchi e finas Giuanne Frantziscu Contu, Sarvadore Cubeddu, Maria Giuanna Piano, Gaetanu Ribichesu, Nerèide Rudas e àteros.

Tzitadinos de su mundu non si naschet. In s’àndala umana, teòrica e esistentziale sua, Bodei at mustradu, in manera crara e ladina, chi un’intelletuale podet diventare tzitadinu de su mundu sena ismentigare, negare o, peus, minispressiare sas raighinas linguìsticas e culturales suas. Dae sa nàschida, sa patente de citoyen du monde niunu de nois la podet àere, proite est carchi cosa chi si devet conchistare. S’inglesu Thomas Paine, pro fàghere solu un’esempru, est diventadu citoyen du monde a pustis àere peleadu in sa revolutzione americana e in cudda frantzesa. In custu sentidu, Bodei est istadu un’esempru bellu meda, chi si devet ammentare a tzertos intelletuales academicos, “ufitziales”, dominantes in situatziones de sutaisvilupu, coloniale o postcoloniale. Issos tantas bortas nos ant propostu unu cosmopolitismu genèricu, chi non est tzertu un’alternativa a sa globalizatzione malaita, dannàrgia pro sa Terra e pro dogni sìngulu logu, pro sa biodiversidade de sos ambientes e pro sa pluralidade de sas limbas.

Bodei connoschiat bene meda sa filosofia clàssica tedesca. Fiat istadu iscolanu de unu mastru mannu, Arturo Massolo. Dae s’esperièntzia cun isse a Pisa, dae sas chircas teòricas e filològicas profundas chi Bodei aiat fatu in Germania, fiat nàschidu unu libru importante meda, Sistema e epoca in Hegel, imprentadu in su 1975 (propostu torra dae sa domo editora Il Mulino de Bologna in su 2014). Bodei connoschiat bene finas Friedrich Holderlin, Max Weber e Ernst Bloch: a custu aiat dedicadu un’àteru volùmene importante meda, Multiversum (1983).

Bodei e s’identidade. Pro su chi tocat s’identidade, bisòngiat nàrrere chi Bodei, in unu primu momentu, aiat manifestadu difidèntzia pro custa paràula. In dogni manera, isse fiat atesu meda dae  giornalistas, intelletuales e acadèmicos chi isparaiant istumbonadas (in italianu: colpo di fucile di grosso calibro, est a nàrrere una sparata, bìdere Dizionario etimologico sardo de Max Leopold Wagner). Bene meda, issos sunt arribbados a su puntu de nàrrere: identidade est paràula fea, mala, identidade cheret nàrrere solu e semper violèntzia, identidade nos podet giùghere a bochire s’ateru, mancari su frade nostru! A foras de sa Sardigna, sos antropologos Marco Aime e Francesco Remotti, s’economista Amartya Sen (Prèmiu Nobel) e àteros teòricos ant iscritu su matessi o cuasi. Forsis non connoschiant sas òberas de Claude Lévi-Strauss o mescamente de Fernand Braudel (L’identité de la France) o de s’istudiosu catalanu Manuel Castells, est a nàrrere de istòricos, sotziòlogos, psicoanalistas chi nos ant mustradu sa possibilidade de fraigare unu cuntzetu in positivu de identidade.

Bodei imbetzes nos at lassadu unu libru suo importante meda, Destini personali. L’età della colonizzazione delle coscienze (Feltrinelli, Milano, 2002), inue at reconnotu s’importàntzia e sa cumplessidade de custu cuntzetu. Cun sa connoschèntzia chi aiat de sa filosofia tedesca, dae Friedrich Nietzsche a àteros, de cudda europea, de sa literadura, dae Luigi Pirandello de Uno nessuno e centomila a àteros iscritores, Bodei in custu volùmene at mustradu  s’esistèntzia de diferentes àndalas pro fraigare e rapresentare s’identidade. Indunas, isse est abarradu atesu meda dae cuddos chi non connòschent sa biblografia, non sighint mancu su dibatidu giornalìsticu subra s’identidade e a pustis cherent pontificare.

Pro s’identidade, su perìgulu, iscriet Bodei, est su modellu consumista, produidu semper prus dae sa fase de su capitalismu, dae sa globalizatzione; sos òmines, est a nàrrere su gai cramadu zoon politikon de Aristotele e “s’animale simbòlicu” de su filosofu tedescu Ernst Cassirer, diventant semper prus pòveros dae unu puntu de bista intelletuale e ispirituale. Su disìgiu de sas mertzes podet arribbare a su puntu de conditzionare o a firmare sa religione e finas Eros. Sa liberalizatzione de sos costumenes sessuales, in realidade, non cheret nàrrere liberatzione positiva de energhias pro fraigare una sessualidade noa, sa prus possìbile armoniosa e echilibrada. A pustis, sa cultura digitale e ipermediale tenet una fortza terrìbile, una capatzidade de intrare in sa cussèntzia umana, de la manipulare, isconnota a mecanismos sotziales, polìticos e culturales de momentos istòricos colados. Est custu su cuadru inue si ponet su problema de mantènnere, ri-formulare o progetare sas identidades pessonales e colletivas.

Unu mastru mannu. Amus a ammentare semper Bodei che mastru de pensieru, pro su raportu positivu chi at mantènnidu cun sa terra sua e nostra, pro s’impignu tzivile chi at postu in s’istùdiu de problemàticas econòmicas, sotziales e polìticas, acumpangiadu semper a una connoschèntzia rigurosa de sos testos clàssicos e de sa literadura filosòfica contemporànea.

 

 

 

 

 

 

 

 

 

 

 

 

 

 

Condividi su:

    Comments are closed.