Lampu, sas istellas! de Mario Pudhu

 

De cantos corpos nos at assupridu

(iscofadas de pei e bussinadas bellas…)

como sos Sardos fintzas sas istellas

pro cantu nos est dófidu amus bidu,

m’a note russa, fintzas annuadu,

e cun sos ogros fatos a bisera,

a iscuru mortu, in custas aeras

petzi che chimbe ndhe amus contadu!

Si no est chi no ischimus a contare,

duas istellas de punta in sa timona

de su Carru mancant, e itorobbona,

e bae e busca s’istella polare!

Su raju it’est, ca no est fatu die?

O chircamus sas cosas a s’iscuru?

O foras che in nois de seguru

isperamus ischindhe mancu in chie?