SU BONU ‘ACHERE PRO FIRMARE S’ISPERDIMENTU, di Bachisio Bandinu

 

Cosa fare per affrontare lo spopolamento dei paesi? Nella Fondazione Sardinia se ne ragiona, discute, propone da anni. In assenza di una politica, decisa e tesa alla soluzione, da parte della Regione sarda, ogni comune cerca soluzioni da solo. A Bitti, un giornale periodico locale (il  MIRACOLO, anno XXI, n° 3/2015), diretta da Marilena Orunesu, propone di “riadottare Bitti” e lancia il dibattito.  Pubblichiamo il primo intervento. Seguirà domani quello dell’economista Nando Buffoni.

Foto: panorama di Bitti.

Dae semitza a tremitza abitantes in d-unu arcu de sessantannos. Dae inoche a vintannos amus a essere duamitza e trechentos. Una vidha destinata, a mediu termine, a s’isperdere. Ma no est curpa de unu destinu chi nos pissichit: sos motivos de s’isperdimentu sono puliticos, economicos e sotziales. E fintzas culturales.

Sa vrigura de sa Sardigna oje si presentat che una “ciambella”, boita intro e prena in sos oros. S’ispopolamentu in su tzentru de s’isula est una chestione de importu mannu. Si ne faedhat dae tempus, ma no est a paraulas chi s’isorven sos nodos, bi cheret progettos e programmas capatzes de dare bonu profettu. E imbetzes sa pulitica regionale, in custos urtimos sessantannos at fattu pacu e nudha a favore de sas zonas internas. S’at gastatu miliardos in s’industria de su petroliu, ca nachi nos vauat richesa e travagliu, l’an cramatu “Piano di Rinascita”, e imbetzes nos at sepultatu in mesu de arga, de velenos, de malattias e de disoccupatzione. Pacos ischin chi sa Sardigna est sa regione prus avvelenata, “inquinata”, de totu s’Italia. Si cussos miliardos los aeren impreatos in s’ammodernamentu de su pastoriu e de sa massaria, in s’artigianatu, in sas siendas fami­liares e de sotzios, in s’ambiente e in su turismu vintzas de sas zonas internas, oje non diamus esser istatos a filu penne.

Non diat servire a nudha a pran­ghere errores de su passatu, si no esseremus suffrinne irbaglios de su presente: unu progettu, approvatu dae sos puliticos, dae sos sinda­catos, dae sos industriales, cheret semenare a gardu pissanculu sa Sardigna dae Macumele in susu; e a canna dae Macumele in josso. Gardos e cannas dian servire comente “biomasse”, cheret narrer arga, pro alimentare sas centrales chi bombene velenos. Totu custu pro produire energia chi non servit a nois sardos ma a su Continente, datu chi sa Sardigna produit energia prus de sa chi cossumat.

Sos capitales internatzionales cheren coperrere s’isula de turres de su ventu, una pala eolica rennet prus de unu milione de euros, chin pacu profettu pro sos sardos, e rovinanne sa bellesa des oss locos. A la narrer franca, nos si son collinne fintzas su sole e su ventu. Pro non faedhare de sos terrinos furatos dae sas bases militares, terras isperditas e avvelenatas dae bombas, terras malaidas de tumores.

Custu est unu cuadru de su malu ‘achere a dannu de sa Sardigna. E ca l’est su bonu ‘achere contra a s’isperdimentu de su populu chi abitat in s’internu de s’isula? Mai postu in contu custu probrema.

Tzertu no est solu pro custu chi sas vidhas nostra sono morinne. Sa chirca chi at fattu Nando Buffoni, economista de gabbale, nos at espricatu in manera crara sos motivos puliticos, economicos e sotziales chi nos an vautu a custu puntu.

Sos numeros nos avverguan chi, in su duamitza e battordichi, in vidha b’at apitu 23 naschitos e 46 mortos. Su movimentu migratroriu registrat 32 pessones iscritta 5, intratas dae foras, e 52 cantzellatas, duncas 20 pessones de mancu. Vidha de vetzos: a dontzi 100 tzova­nos currisponnene 229 antzianos. De sos chi travagliana, prus sono sos  antzianos chi non sos tzova­nos. Su Liceo Scientifico, ocannu, no est resessitu a formare una prima classe, un’iscola mori mori. Sichinne gai nos isperdimus.

Cales poten essere sos remedios?

Sos tremitzas abitantes de oje potet esser unu numeru chi annat bene, in su sensu chi currisponnet a sas possibilitates economicas, a sas risorsas territoriales, lavorativas e umanas, oje a s’istatu presente. Su bussu est de non minimare dae sos tremitza. Su jocu ressessit a tzertas conditziones: o bi naschit prus pitzinnos novos, pro ugualare sos mortos, o bi ‘enit prus tzente dae foras, o bi restat prus pessones in vidha imbetzes de si nche annare. Bisontzat de ‘achere una pulitica chi vavorat custas possibbilitates: premios pro sas naschitas e pro cullevare sos pitzinnos, imbentare attivitates novas e affortire sas esi­stentes, in modu chi sos tzovanos resten in bidha. Pro narrere: totu sos impiegatos de sa Regione, de sas ASL e de atteros servrtzros, poten travagliare in domo issoro in bidha chin su “telelavoro”. Sos chi travagliana in Nugoro o in bidhas accurtzu, organizannesi, poten torrare donzi die a bidha, comente ‘achen sos durgalesos, sos oliane­sos e sos mamujadinos.

Pichemas in cussideru su pasto­riu: cantos tzovanos oje essi n a campu? O amus a aere cuiles de rumenos, macedones e alba­nesos? Comente imbentare unu pastoriu novu chi rennat de prus e chi siat cumbeniosu. Pastores chin su diploma o chi sa laurea, pro no essere solu murghitores aspeandhe su preju de piazza. In tempos nostros bisontzat de ischire ite produire e comente produire e pro chie, in manera de ‘ennere su prodottu in su marcatu mondiale, attentos a sos bisont­zos semper novos de sa populatzione e sa modas alimentares chi cambian de continuo. Vitzi potet ‘antare artigianatu de oraria, de tessitura, siendhas de mastros de linna, de pedhe, de pannu e de atteras attivitates chi no accudan solu a sos bisontzos de sa ‘idha ma s’allarghen a marcatos antzenos e a su turismu? Custu devet essere s’obbietivu. Un’assempru meritosu est sa siendha de Terra Pintada, ma fintzas sas cooperativas e sas associatziones de cata tzenia, su volontariatu.

Amus cussentzia de sos benes ambientales e culturales de Vitzi? E comente tramutare custos benes in risorsas economicas? Su travagliu est un’imbentu. Una ‘emina de Guspini at imbentatu unu isolante, premiatu e pretziatu, dae sa lana de erveche.

Meritat prus afficu su suegliu, non comente bene a benefitziu de natura, ma comente un’inve­stimentu economicu de profettu mannu. Pianta de contipitzare chin arte pro una rennita importante, capatze de dare travagliu.

Si s’economia metzorat e b’at lavoru, sa tzente restat in bidha. Tzertu non si poten trattennere metas categorias de laureatos: Vitzi at chentu laureatos in medicina, 50 laureatos in veterinaria. Sa vidha ne potet impiegare 5 o 6, sos atteros deven annare a foras: est un’ arrejonu chi’ alet pro atteras professiones.

A sa concruita, devimus torrare a su comintzu des’arrejonu: una puli­tica nova chi approntet program­mas economicòs de travaglios e de servitzios contra s’isperdimentu de sas vidhas. Su ‘inari non si lu devet gastare solu Casteddu e sas tzitates, ma est de importu mannu mescamente una cosa: s’irvilupu non devet essere istrantzu, pertocat imbetzes a sas risorsas sardas e a profettu de sos sardos, chi deven essere meres nessi de su territoriu e de s’ambiente issoro. Meres in domo issoro.

Nando Buffoni l’ataccraratu bene: non bastat una pulitica de mante­nimentu, non bastat una pulitica de assistentzia, bisontzat de affrontare dae raichina sos impedimentos chi si ponen de rucratis. Metta potet ‘achere sa vidha chin s’abbritiu, chin s’intelligentzia e chin impignu, ma dae sola non bi la potet ‘achere, sa pulitica regionale at una respon­sabbilitate manna. •