Sos contos de Luciano Carta

Meda tempus faghet b’istaiat in su coddhu de Coronas un’omine ’ezzu meda brulleri, chi sos chi lezzent ant giai connottu in d’un’ateru contigheddhu: tiu Tenàghe, chi a sambinadu faghiat Zolo, che a mie etotu da parte ’e mama.
Fimis in s’istiu de su Sessanta e fio torradu dae pagu dae Salighera, inue fio anbdhadu a istudiare s’annu innanti. Aio appenas finidu sa primma Media.

Unu sero, candho su ’ighinadu fit totu in carrela a friscurare, a contare contos de foghile, a chistionare de onzi cosa, a iscurtare, candho pesaiant sa ’oghe, sos terracuzadores, e sos mannos puru a faeddhare de bestiamine e de incunza. Eo puru mi che so accorziadu a sa piazza ’e susu, in sa funtana noa, a costas de sa domo de tiu Tenaghe, ue si regolliat sa zente. Comente mi so sezzidu, tiu Tenaghe, chi fumaiat a fogu a intro, m’at dimandhadu:

“Luzià’, eh! za fio duas dies chenza ti biere. Elle inue ti che fis irdeortadu!”.
“So partidu a Salighera po istudiare”.
“Ah, bene meda! E nara, bellu me’, e ite bos imparant in iscola”.
L’appo nadu:

“Nos imparant s’italianu, s’istoria, sa geografia, s’educazione fisica…”.
M’at frimmadu subitu e m’at nadu:

“E ite balla est custa educazione fisica”.
L’appo rispostu:

“Su mastru nos imparat a currere, a brincare…”.
E isse luego, ridindhe a iscracalliu:

“Comente? Elle brulladhe mi sese! Elle po brincare b’hat bisonzu de unu mastru!?! Bella abberu est custa! Esistit puru unu mastru ’e brincos!”.
Dae tandho sa ’essìda de tiu Tenaghe mi est passida bella e curiosa e, a s’accua, a sos professores de Educazione fisica los appo sempre cramados “mastros de brincos”.

Condividi su:

• 
•